ទឹកធ្លាក់ភ្នំខៀវអូរតាវ៉ៅ ក្លាយជារម្មណីយដ្ឋានទេសចរណ៍ធម្មជាតិ ដ៏មានសក្តានុពលនៅខេត្តប៉ៃលិន បន្ទាប់ពីរដ្ឋបាលខេត្ត ស្ថាបនាផ្លូវបេតុងអាមេរួចរាល់

ប៉ៃលិន៖ រមណីយដ្ឋានធម្មជាតិទឹកធ្លាក់ភ្នំខៀវអូរតាវ៉ៅ មានចម្ងាយចេញពីផ្លូវជាតិលេខ ៥៧ ប្រមាណជាង ៧គីឡូម៉ែត្រ ស្ថិតក្នុងភូមិខ្លុង សង្កាត់ឣូរតាវ៉ៅ ក្រុងប៉ៃលិន ខេត្តប៉ៃលិន ហើយរមណីយដ្ឋាននេះ មានទេសភាពល្អ ស្រស់ស្អាតជាងគេបំផុតនៅក្នុងខេត្ត ដោយមានទឹកជ្រោះថ្លាឆ្វង់ ហូរកាត់ផ្ទាំងថ្ម ជាច្រើនដំណាក់ រហូតដល់ ៧ជាន់ ជាមួយសម្រស់ធម្មជាតិនៅអមទឹកហូរ ពេលភ្ញៀវទេសចរណ៍ចូលទៅលេងកម្សាន្ត ធ្វើឱ្យត្រជាក់ បំបាត់ទុក្ខកង្វល់ និងមានអារម្មណ៍ស្រស់ថ្លាថែមទៀតផង៕បច្ចុប្បន្នរដ្ឋបាលខេត្តប៉ៃលិន ក្រោមការដឹកនាំរបស់លោកជំទាវ បាន ស្រីមុំ ជាអភិបាលខេត្ត បាន ធ្វើការស្ថាបនារួចរាល់ផ្លូវឡើងទៅកាន់រមណីយដ្ឋានធម្មជាតិទឹកធ្លាក់ភ្នំខៀវអូរតាវ៉ៅ ដោយចាក់បេតុងអាមេ ប្រវែងជាង ២ពាន់ម៉ែត្រ ព្រមទាំងកែរលម្អសោភ័ណភាពបន្ថែម ធ្វើសួនច្បារ ដាំផ្កាភ្ញី តុបតែងផ្កា និងសត្វសិប្បនិម្មិតមួយចំនួន ចំណែកដើមឈើហូបផ្លែធំៗ ដូចជា៖ ដើមស្វាយ ដើមសាវម៉ាវ និងដើមឈើមានតម្លៃជាដើម គឺទុកសម្រាប់ទាក់ទាញភ្ញៀវទេសចរណ៍ជាតិ និងអន្តរជាតិ មកលេងកំសាន្ត ។ដោយមើលឃើញពីសក្តានុពល នៃវិស័យទេសចរណ៍ធម្មជាតិ និងដើម្បីលើកកម្ពស់សោភ័ណភាព រមណីដ្ឋានធម្មជាតិទឹកធ្លាក់ភ្នំខៀវអូរតាវ៉ៅ លោកជំទាវ បាន ស្រីមុំ បានណែនាំអោយយុវជន សសយក ខេត្ត សហការជាមួយមន្ត្រីជំនាញ ធ្វើការរៀបចំសណ្តាប់ធ្នាប់ អនាម័យ និងកែរលម្អហេដ្ឋារចនាសម័ន្ធនានា ព្រមទាំងរុះរើកញ្ចុះដែលពុកផុយចេញ និងដាក់ជំនួសដោយកញ្ចុះថ្មី ដែលមានរចនាបថបែបទាក់ទាញ ប្រកបដោយសុវត្ថិភាព សម្រាប់ទទួលភ្ញៀវទេសចរណ៍ ចូលមកកម្សាន្តនៅលើទឹកដីដ៏តូចច្រឡឹងនៃខេត្តត្បូងពេជ្រមួយនេះ។សូមបញ្ជាក់ថា៖ បច្ចុប្បន្ននេះ ផ្លូវគមនាគមន៍ទៅកាន់រមណីដ្ឋានធម្មជាតិទឹកធ្លាក់អូរតាវ៉ៅ គឺមានផ្លូវក្រាលកៅស៊ូ ១ខ្សែរស្ថាបនារួចរាល់ ១០០% ប្រភេទ DBST មាន ទទឹង ២០ម៉ែត្រ ប្រវែងជាង ៥គីឡូម៉ែត្រ ចាប់ពីចំនុចផ្លូវជាតិលេខ ៥៧ រហូតដល់កុងត្រូលច្រកចូលរម្មណីយដ្ឋាន និងផ្លូវបេតុងអាមេ ១ខ្សែរ មាន ទទឹង ៨ម៉ែត្រ ប្រវែង ២គីឡូម៉ែត្រ បន្តពីផ្លូវក្រាលកៅស៊ូ រហូតដល់រម្មណីយដ្ឋានតែម្តង ដើម្បីផ្តល់សេវាឱ្យកាន់តែងាយស្រួល ក្នុងការធ្វើដំណើររបស់ភ្ញៀវទេសចរណ៍ជាតិ+អន្តរជាតិ ដែលជាកត្តាជួយជំរុញកំណើនភ្ញៀវទេសចរណ៍មកកំសាន្តក្នុងខេត្តប៉ៃលិន។ អត្ថបទ៖ លោក ញ៉ឹប បូរី