ប៉ៃលិន៖ ព្រឹកថ្ងៃទី០៣ ខែឧសភា ឆ្នាំ២០២៤ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្ត ប៉ៃលិន បានអញ្ជើញចុះសំណេះសំណាលសួរសុខទុក្ខ និងនាំយកអំណោយទៅឧបត្ថម្ភដល់កម្មករ ដែលកំពុងសាងសង់ អគារសិក្សាថ្មី នៅសាលាអនុវិទ្យាល័យផ្សារព្រំ ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដើម្បីឧទ្ទិសកុសលដល់វិញ្ញាណក្ខ័ន្ធ ឧបាសិកា ប៊ុន សុខថា ។
លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន ក៍បានមានប្រសាសន៍នាំមកនូវបណ្តាំផ្ញើសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដល់បងប្អូនកម្មករ សាងសង់អគារសិក្សាថ្មី នៅសាលាអនុវិទ្យាល័យផ្សារព្រំទាំងអស់ ដែលកំពុងស្ថាបនាយ៉ាងមមាញឹក ដើម្បីឆ្លើយតបទៅនឹងតម្រូវការចំាបាច់ និងសម្រួលដល់ការសិក្សា-ការស្នាក់នៅ របស់សិស្សានុសិស្ស និងលោកគ្រូអ្នកគ្រូនៅក្នុងតំបន់នោះ។
លោកជំទាវបណ្ឌិតអភិបាលខេត្ត បានមានប្រសាសន៍លើកឡើងថា៖ ការសាងសង់អគារសិក្សាថ្មីទាំងនេះ គឺសុទ្ធតែជាចក្ខុវិស័យ របស់សម្ដេចតេជោ ហ៊ុន សែន ដើម្បីជួយលើកកម្ពស់វិស័យអប់រំ ក៏ដូចជាការបង្ខិតសាលារៀន ឱ្យនៅកាន់តែជិតបំផុត ដល់សិស្សានុសិស្ស ដើម្បីឱ្យពួកគេកាន់តែងាយស្រួល និងមានឱកាសទៅរៀនសូត្រ ដូចសិស្សដទៃៗទៀត សមតាមបំណងប្រាថ្នាក្រោមម្លប់សន្តិភាព ដូច្នេះយើងទាំងអស់ ត្រូវរួមសាមគ្គីគ្នា បន្តថែរក្សាការពារសុខសន្តិភាព ដែលមាននេះឱ្យបានគង់វង្ស ព្រោះថាសុខសន្តិភាពជាមូលដ្ឋានគ្រឹះដ៏រឹងមាំ សម្រាប់ការអភិវឌ្ឍប្រទេស និងនាំឱ្យមានអ្វីៗគ្រប់យ៉ាង ៕
នាឱកាសនោះផងដែរ លោកជំទាវបណ្ឌិត បាន ស្រីមុំ ក៍បានមានប្រសាសន៍ផ្តាំផ្ញើមេការ និងកម្មករសាងសង់ទាំងអស់ ត្រូវខិតខំធ្វើការងារ អោយសម្រេចបានទៅតាមផែនការ ដែលបានគ្រោងទុក និងត្រូវមានការប្រុងប្រយ័ត្នខ្ពស់ ចំពោះគ្រោះថ្នាក់ដែលកើតឡើងជាយថាហេតុ ជាពិសេស ត្រូវចេះថែទាំសុខភាព ព្រោះរដូវកាលនេះ អាកាសធាតុក្តៅខ្លាំង ហើយបើមានបញ្ហាអ្វីកើតឡើង ត្រូវប្រញ៉ាប់រាយការណ៍ជាបន្ទាន់មកអាជ្ញាធរមូលដ្ឋាន ឬក៍ប្រធានមន្ទីរអប់រំ យុវជន និងកីឡាខេត្ត ។
បើតាមរបាយការណ៍របស់លោក តង់ ធារ៉ា ប្រធានមន្ទីរអប់រំ យុវជន និងកីឡាខេត្ត បានអោយដឹងថា៖ អគារ ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នៅសាលាអនុវិទ្យាល័យផ្សារព្រំ គឺមានអគារសិក្សា ចំនួន ២ខ្នង ស្មើនឹង ៦០បន្ទប់ និងអគារទីចាត់ការចំនួន ២ខ្នង ដោយឡែកនៅក្នុងឱកាសសំណេះសំណាលសួរសុខទុក្ខនេះដែរ លោកជំទាវបណ្ឌិត បាន ស្រីមុំ ក៍បានឧបត្ថម្ភដល់បងប្អូន កម្មករសាងសង់ ចំនួន ២៩នាក់ ដោយក្នុងម្នាក់ៗ ទទួលបាន អង្ករ ២៥គីឡូក្រាម មី ១កេស ត្រីខ ១យួ ទឹកបរិសុទ្ធ ១កេស និងថវិកាចំនួន ៥ម៉ឺនរៀល ។
អត្ថបទ៖ លោក ញ៉ឹប បូរី
