ក្រសួងមហាផ្ទៃ ណែនាំអភិបាលខេត្តជាប់ព្រំដែនពង្រឹងការគ្រប់គ្រងការចេញ-ចូលតាមច្រកព្រំដែន

(ភ្នំពេញ)៖ ឯកឧត្តម ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅថ្ងៃទី៣ ខែតុលា ឆ្នាំ ២០២៣នេះ ​បានដាក់ចេញការណែនាំ ដល់អភិបាលខេត្តជាប់ព្រំដែនក្នុងការពង្រឹងការគ្រប់គ្រង និង​ការ​ត្រួតពិនិត្យការចេញ-ចូលឆ្លងកាត់ព្រំដែន ដើម្បីពង្រឹងសន្ដិសុខ សណ្ដាប់ធ្នាប់សាធារណៈ និងរបៀបរៀប​រយ​តាមបណ្ដោយខ្សែបន្ទាត់ព្រំដែន។ យោងតាមសេចក្ដីណែនាំរបស់ឧបនាយករដ្ឋមន្ដ្រី ស សុខា បានបញ្ជាក់ថា ក្រោយមើលឃើញ​មាន​ភាព​ខ្វះ​ចន្លោះ និងភាពមិនប្រក្រតីមួយចំនួនដែលកើតចេញពីការធ្វេសប្រហែស ក្នុងការ​អនុវត្ត​តួនាទីភារកិច្ច ដូច្នេះទើបក្រសួងមហាផ្ទៃសម្រេចដាក់ចេញការណែនាំនេះ។ រដ្ឋមន្រ្ដី​ក្រសួងមហាផ្ទៃ ដល់អភិបាលខេត្តជាប់ព្រំដែន ត្រូវបិទច្រក​របៀង​ខុស​ច្បាប់​ទាំង​អស់​ក្នុង​ដែន​សមត្ថកិច្ច​របស់ខ្លួន។ ក្នុងករណីចាំបាច់ ត្រូវ ធ្វើការសិក្សា ស្រាវជ្រាវ និងវាយតម្លៃ​លើ​សក្តានុពល​សេដ្ឋកិច្ចនិងសង្គមរបស់ច្រកដែល មានស្រាប់ រួចលើកសំណើមកក្រសួងមហាផ្ទៃ ដើម្បី​មាន​មូលដ្ឋានសិក្សានិងលើកយោបល់ ជូនថ្នាក់ដឹកនាំ ពិនិត្យ សម្រេច ក្នុងការ​បង្កើត​ជា​ច្រកទ្វារ​ព្រំដែនផ្លូវការ។ អភិបាល​ខេត្តជាប់ព្រំដែន ត្រូវចាត់វិធានការដើម្បីពង្រឹងការគ្រប់គ្រងនិងការត្រួតពិនិត្យអ្នកដំណើរ ទំនិញ និងមធ្យោបាយ ចេញចូលឆ្លងកាត់ព្រំដែន សំដៅបង្ការ ទប់ស្កាត់ និងបង្ក្រាប​រាល់​បទ​ល្មើស​ឆ្លង​ដែន​គ្រប់​ប្រភេទ ជាពិសេសត្រូវពង្រឹងការទទួលខុសត្រូវលើសន្តិសុខ សុវត្ថិភាព សណ្តាប់​ធ្នាប់​សាធារណៈ ​និងរបៀបរៀបរយ នៅតាម​បណ្តា​ច្រកទ្វារ​ព្រំដែន​ដែល​ស្ថិត​ក្នុង​ដែន​សមត្ថកិច្ច​របស់​ខ្លួន​។ អភិបាលខេត្តជាប់ព្រំដែន ត្រូវក្រើន​រំលឹក​ដល់​អាជ្ញាធរ​មាន​សមត្ថកិច្ច​ឈរ​ជើង​នៅ​តាម​បណ្តា​ច្រកទ្វារ​ព្រំដែនទាំងអស់ឲ្យបញ្ឈប់ជាបន្ទាន់នូវការចេញឯកសារឆ្លងដែនមិនប្រក្រតី និងការ​យក​កម្រៃ​ក្រៅ​ផ្លូវការពីពលករ និងប្រជា​ពលរដ្ឋ​ទូទៅ​នៅ​ពេល​ពួកគាត់ឆ្លងកាត់​ចេញចូល​តាម​បណ្តា​ច្រកទ្វារ​ព្រំដែនដែលផ្ទុយពីស្មារតី នៃកិច្ចព្រមព្រៀងជាមួយប្រទេសជិតខាង ព្រមទាំងច្បាប់ និង​លិខិត​បទដ្ឋាន គតិយុត្តជាធរមាន នៃព្រះរាជាណាចក្រកម្ពុជា។ រដ្ឋមន្រ្ដីក្រសួងមហាផ្ទៃ ក៏បានណែនាំដល់អភិបាលខេត្តជាប់ព្រំដែន ត្រូវបន្តផ្តល់សេវាសាធារណៈ និង​សេវាប័ណ្ណព្រំដែនជូនប្រជាពលរដ្ឋដោយគ្មានការ រើសអើង ដើរទន្ទឹមនឹងការគ្រប់គ្រង​ស្ថិតិ​ និង​លំហូរ​ប្រជាពលរដ្ឋចេញចូលឆ្លងកាត់ព្រំដែន ឲ្យបានច្បាស់លាស់ ព្រមទាំង​ខិតខំ​ដោះ​ស្រាយ​បញ្ហា​ប្រឈម​នានាដែលកើតមានឡើងនៅតាមបណ្តាច្រកទ្វារព្រំដែន ស្ថិតក្នុងដែន​សមត្ថកិច្ច​របស់​ខ្លួន​ឲ្យបានល្អប្រសើរ។ ត្រូវចាត់វិធាន​ការ​ផ្លូវ​ច្បាប់​ឲ្យ​បាន​ម៉ឺងម៉ាត់​ក្នុង​ការ​បង្ក្រាប​សកម្មភាព​មេ​ខ្យល់​ និងអ្នកសមគំនិត ដែលអូសទាញប្រជាពលរដ្ឋឱ្យឆ្លងដែនខុសច្បាប់តាមគ្រប់រូបភាព។ ស្រប​គ្នានេះដែរ ត្រូវធ្វើការអប់រំ ណែនាំ និងផ្សព្វផ្សាយឲ្យបានទូលំទូលាយ​ជាប់ជាប្រចាំ​ដល់​ប្រជាពលរដ្ឋ​នៅ​មូលដ្ឋាន នៅពេលចេញចូលឆ្លងកាត់ព្រំដែន ត្រូវមានឯកសារឆ្លង​ដែន​ស្រប​ច្បាប់​ដែល​ចេញ​ដោយ ក្រសួងស្ថាប័ននិងអាជ្ញាធរមានសមត្ថកិច្ច ដើម្បីចៀសវាងការជួញដូរមនុស្ស ការ​កេងប្រវ័ញ្ច កម្លាំងពលកម្ម ការប្រព្រឹត្តបទល្មើស និងផលវិបាកផ្សេងៗនៃការឆ្លងដែនខុសច្បាប់។ រដ្ឋមន្រ្ដីក្រសួងមហាផ្ទៃក៏បានណែនាំឱ្យ បន្តអប់រំ ណែនាំ ផ្សព្វផ្សាយ និង​លើកកម្ពស់​ការ​យល់​ដឹង​ជូន​ប្រជាពលរដ្ឋ ជាពិសេស អ្នករស់នៅតាមតំបន់ព្រំដែន ឲ្យបានយល់​ជ្រួត​ជ្រាប​អំពី​បែប​បទ​នីតិ​វិធី ​នៃការឆ្លងកាត់ព្រំដែន ព្រមទាំងលើកទឹកចិត្តឲ្យពួកគាត់ចូលរួមសហការ និងរាយការណ៍​នូវ​រាល់​ភាព​មិនប្រក្រតី នានានៅតាមតំបន់ព្រំដែន និងតាមបណ្តា​ច្រកទ្វារ​ព្រំដែន​ជា​មួយ​ប្រទេស​ជិត​ខាង​។ រដ្ឋមន្រ្ដីក្រសួងមហាផ្ទៃប្រកាសថា នឹងចាត់​ក្រុមការងារ​ជំនាញ​ដឹក​នាំ​ដោយ​អគ្គ​នាយកដ្ឋាន​រដ្ឋបាល ដោយមានការចូលរួមពីតំណាងអគ្គស្នងការដ្ឋាននគរបាលជាតិ និង​អគ្គនាយកដ្ឋាន​អន្តោ​ប្រវេសន៍​ ដើម្បីចុះតាមដាន ត្រួតពិនិត្យ និងវាយ​តម្លៃ​លើ​ការ​បំពេញ​តួនាទី​ភារកិច្ច​នៅ​តាម​បណ្តា​ច្រក​ទ្វារ ព្រំដែនទាំងអស់ សំដៅលើកកម្ពស់ និងពង្រឹងប្រសិទ្ធភាពការងារ។ ក្នុង​ករណី​រក​ឃើញ​ថា​ ច្រកទ្វារព្រំដែនណាមួយកើតមានបញ្ហាមិនប្រក្រតីបណ្តាលមកពីការអនុវត្តតួនាទីភារកិច្ច មិន​បាន​ត្រឹម​ត្រូវតាមគោលការណ៍ច្បាប់ និងលិខិតបទដ្ឋានគតិយុត្តដែលបានកំណត់ ក្រសួង​មហាផ្ទៃ​នឹ​ងចាត់វិធានការតាមផ្លូវច្បាប់ជាធរមាន៕