ខេត្តតាកែវ ៖ កម្លាំងនគរបាលស្រុកគិរីវង់ នៃស្នងការដ្ឋាននគរបាលខេត្តតាកែវ បានស្រាវជ្រាវឃាត់ខ្លួនជនសង្ស័យម្នាក់ ករណីគប់កញ្ចក់រថយន្តអ្នកដំណើរតាមផ្លូវជាតិលេខ៣ ។
ករណីជនបង្កធ្វើអោយខូចខាតដោយចេតនា (គប់កញ្ចក់រថយន្ត) កើតឡើងនៅវេលាម៉ោង០៦និង៤០នាទីល្ងាចថ្ងៃទី០៧ ខែមីនា ឆ្នាំ២០២៣ នៅចំណុចភូមិត្រពាំងខ្ចៅ ឃុំរាមអណ្តើក ស្រុកគិរីវង់ ខេត្តតាកែវ ។
ជនសង្ស័យឈ្មោះ ព្រែក តុង ភេទប្រុស អាយុ២៥ឆ្នាំ មានទីលំនៅភូមិត្រពាំងខ្ចៅ ឃុំរាមអណ្តើក ស្រុកគិរីវង់ ខេត្តតាកែវ (មុខសញ្ញាប្រើប្រាស់គ្រឿងញៀន) ។
បើតាមមន្ត្រីនគរបាលស្រុកគិរីវង់ បានអោយដឹងថា ជនសង្ស័យខាងលើបានធ្វើសកម្មភាពយកកំណាត់ឈើ ប្រវែង៦.០សង់ទីម៉ែត្រ គប់ទៅលើរថយន្តម៉ាក RAVE4 ពណ៌សំបកឪឡឹក ពាក់ស្លាកលេខ ភ្នំពេញ 2N-2833 របស់ជនរងគ្រោះឈ្មោះ សេក សម្បត្តិ ភេទប្រុស អាយុ៥២ឆ្នាំ មានទីលំនៅភូមិព្រៃជើង ឃុំគោកព្រេច ស្រុកគិរីវង់ ខេត្តតាកែវ បានធ្វើដំណើរពីត្បូងទៅជើង គោលបំណងជិះទៅផ្ទះ បណ្តាលឲ្យរថយន្តរងការខូចខាតកញ្ចក់បាំងក្រោយខាងឆ្វេង ។
ក្រោយទទួលបានព័ត៌មាន កម្លាំងជំនាញ បានចុះដល់កន្លែងកើតហេតុ ស្រាវជ្រាវឃាត់ខ្លួនជនសង្ស័យម្នាក់ ដើម្បីកសាងសំណុំរឿងបញ្ជូនទៅសាលាដំបូងខេត្តតាកែវ ចាត់ការតាមនីតិវិធី ៕
