អណ្ដាតភ្លើងឆាបឆេះទូរថភ្លើងយ៉ាងសន្ធោសន្ធៅផ្អើលស្ថានីយរថភ្លើង

រាជធានី​ភ្នំពេញ ៖ បើ​តាម​សេចក្តីរាយការណ៍​បានឱ្យ​ដឹង​ថា អគ្គិភ័យ​បាន​លេប​ត្របាក់​ទូរថភ្លើង ចាស់​ទុក​ចោល​សម្រាប់​ឱ្យ​បុគ្គលិក​ស្នាក់​នៅ​មួយ​កន្លែង បង្ក​ឱ្យ​ក្លាយជា​អណ្ដាតភ្លើង​ឆាបឆេះ​យ៉ាង​សន្ធោសន្ធៅ រហូត​ឆេះ​រាលដាល​ទៅ​ដល់​ទូរថភ្លើង​ថ្មី​ទៀត បណ្ដាល​ឱ្យ​រង​ការ​ខូចខាត​អស់​មួយ​ទូ​។ ហេតុការណ៍​នេះ បង្ក​ឱ្យ​មានការ​ភ្ញាក់ផ្អើល​កាលពី​វេលា​ម៉ោង​៣​និង​៣០​នាទី​រំលង​អធ្រាត្រ​ឈាន​ចូល​ថ្ងៃ​ទី​២៧ ខែសីហា ឆ្នាំ​២០២៣ នៅ​ចំណុច​ស្ថានីយ​រថភ្លើង ក្នុង​បឹង​កក់ ស្ថិត​ក្នុង​សង្កាត់​ស្រះ​ចក ខណ្ឌដូនពេញ រាជធានី​ភ្នំពេញ​។បើ​តាម​ប្រភព​ព័ត៌មាន​នៅ​កន្លែង​កើតហេតុ បាន​ប្រាប់​ឱ្យ​ដឹង​ថា ទូរថភ្លើង​ដែល​ត្រូវ​អណ្ដាតភ្លើង​ឆាបឆេះ​នោះ គឺជា​ទូរថភ្លើង​ដែល​ក្រុមហ៊ុន​ទុក​ចោល​ឈប់​ប្រើប្រាស់ និង​ទុក​សម្រាប់​ឱ្យ​បុគ្គលិក​ស្នាក់​នៅ​ផង​ដែរ​។ ហើយ​ចំពោះ​មូលហេតុ​នៃ​ការ​ឆាបឆេះ​វិញ នៅ​មិន​ទាន់​មាន​ប្រភព​ណាមួយ​អាច​បញ្ជាក់​បាន​នៅឡើយ​ទេ​។ប្រភព​ដដែល​បាន​បន្ត​ថា មុន​ពេល​កើតហេតុ គេ​ឃើញ​មាន​អណ្ដាតភ្លើង​ឆាបឆេះ​រាលដាល​យ៉ាង​សន្ធោសន្ធៅ​ពេញ​ក្នុង​ទូរថភ្លើង​ចាស់​នោះ​តែ​ម្ដង ដោយ​បញ្ចេញ​ផ្សែងហុយ​យ៉ាង​ខ្មួលខ្មាញ់ និង​ឆេះ​រាលដាល​ដល់​ទូរថភ្លើង​ថ្មី​ទៀត​ផង បណ្តាល​ឱ្យ​ឆេះ​អស់​មួយ​ទូ​រង​ការ​ខូចខាត​។ ភ្លាម​ៗ​នោះ ប្រជាពលរដ្ឋ​បាន​រាយការណ៍​ប្រាប់​សមត្ថកិច្ច​មូលដ្ឋាន ដើម្បី​បញ្ចេញ​រ៉ឺ​ម៉ក់​ម៉ូតូ​ដឹក​ទឹក​មក​ជួយ​សង្គ្រោះ​បឋម​ភ្លាម​ៗ និង​រាយការណ៍​ប្រាប់​នគរបាល​បង្ការ​ពន្លត់​អគ្គិភ័យ និង​រថយន្ត​ពន្លត់​អគ្គិភ័យ​ជា​ច្រើន​គ្រឿង ដើម្បី​ជួយ​អន្តរា​គន៍​បាញ់​ទឹក​ពន្លត់​ភ្លាម​ៗ​ឱ្យទាន់​ពេលវេលា​ផង​ដែរ​។ប្រភព​ដដែល​បញ្ជាក់​ថា ចំពោះ​មូលហេតុ​នៃ​ការ​ឆាបឆេះ​ទូរថភ្លើង​ខាងលើ​នេះ នៅ​មិន​ទាន់​មាន​ប្រភព​ណាមួយ​អាច​បញ្ជាក់​បាន​នៅឡើយ​ទេ ហើយ​សមត្ថកិច្ច​ជំនាញ​បង្ការ និង​ពន្លត់​អគ្គិភ័យ កំពុង​តែ​ធ្វើការ​ស្រាវជ្រាវ​រក​មូលហេតុ​ហើយ​។