ឃាត់ខ្លួន អ្នករត់ផាសអាប់ បើកបញ្ច្រាសទិសហើយ ប្រុងបង្កហិ.ង្សាលើអ្នកបើករថយន្ត នៅខណ្ឌចំការមន

រាជធានី​ភ្នំពេញ ៖ បុរស​អ្នកបើកបរ​ផាស​អាប់ (Pass App) បញ្ច្រាស់ទិស​ដៅ​ចរាចរណ៍ ហើយ​គំរាម​រក​វាយ​ប្រជាពលរដ្ឋ​ថែម​ទៀត​នោះ ត្រូវ​បាន​សមត្ថកិច្ច​នគរបាល​ខេត្តកណ្ដាល ឃាត់ខ្លួន​បាន​ហើយ នៅព្រលប់​​ថ្ងៃ​ទី​១៥ ខែសីហា ឆ្នាំ​២០២៣នេះ ក្នុងស្រុក​ខ្សាច់កណ្ដាល ប៉ុន្តែដោយហេតុ​ការណ៍​នេះ​កើតឡើង​នៅ​រាជធានី​ភ្នំពេញ ក្រោយ​ឃាត់ខ្លួន​ កម្លាំង​សមត្ថកិច្ច​ខេត្តកណ្ដាល ​កំពុង​រៀបចំ​បញ្ជូន​ទៅ​ស្នងការដ្ឋាន​នគរបាល​រាជធានី​ភ្នំពេញ វិញ ដើម្បី​ចាត់ការ​បន្ត ។បើ​តាម​ស្នងការដ្ឋាន​នគរបាល​រាជធានី​ភ្នំពេញ បានអោយ​ដឹង​ថា បន្ទាប់​ពី​បានឃើញ​វី​ដេ​អូ នៅ​លើ​បណ្តាញ​សង្គម​ភ្លាម លោក​ឧត្តមសេនីយ៍ឯក ស ថេ​ត អគ្គស្នងការ​រង និង​ជា​ស្នងការ​នគរបាល​រាជធានី​ភ្នំពេញ បាន​ដាក់​បទបញ្ជា​ដល់​សមត្ថកិច្ច​ត្រូវ​ធ្វើការ​ស្រាវជ្រាវ រក​អ្នកបើកបរ​ម៉ូតូ​កង់​បី បញ្ច្រាសទិស ដែល​មាន​បំណង​ប្រើ​ដែក​ទីប វាយ​មក​លើ​អ្នកបើកបរ​រថយន្ត​នោះ​ឲ្យ​ឃើញ ។ដោយ​អនុវត្ត​តាម​បទបញ្ជា កម្លាំង នៃ​អធិការដ្ឋាន​នគរបាល​ខណ្ឌចំការមន បាន​ធ្វើការ​សហការ​ជាមួយ​កម្លាំង នៃ​អធិការដ្ឋាន​នគរបាល​ស្រុក​ខ្សាច់កណ្តាល ខេត្តកណ្តាល បាន​ធ្វើការ​ឃាត់ខ្លួន​បុរស​ម្នាក់​បើកបរ​កង់​បី​ឥណ្ឌា (​ផាស​អាប់​) ដែល​បើកបរ​បញ្ច្រាសទិស នៅ​តាម​បណ្តោយ​ផ្លូវ​ព្រះ​នរោត្តម សង្កាត់​ទន្លេបាសាក់ ខណ្ឌចំការមន រួច​ក៏​មាន​ជម្លោះ​ប្រកែក​គ្នា រវាង​អ្នកបើកបរ​កង់​បី​ឥណ្ឌា​ជាមួយ​អ្នកបើកបរ​រថយន្ត ដោយ​អ្នកបើកបរ​កង់​បី​ឥណ្ឌា មាន​បំណង​ប្រើប្រាស់​ដែក​ទីប​វាយ ទៅ​លើ​ម្ចាស់​រថយន្ត និង​អ្នក​រួម​ដំណើរ​ទៀត​ផង ។កម្លាំង​ចម្រុះ​បាន​ធ្វើការ​សហការ​គ្នា​ជាមួយ​កម្លាំង​ស្នងការដ្ឋាន​នគរបាល​ខេត្តកណ្តាល ស្រាវជ្រាវ​រហូត​ឃាត់ខ្លួន​ម្ចាស់​កង់​បី​ឥណ្ឌា (​ផាស​អាប់​)​ខាងលើ ដើម្បី​យក​មក​សួរនាំ និង​អនុវត្ត​បន្ត​តាម​នីតិវិធី​ច្បាប់​ហើយ ៕