រាជធានីភ្នំពេញ ៖ បុរសម្នាក់ដោយសារតែខឹងសង្សាដែលជិះម៉ូតូជាមួយគ្នាចុះពីលើម៉ូតូ ក៏ស្រាប់តែបុរសរូបនោះជិះម៉ូតូលឿនឡើងស្ពានច្បារអំពៅ ក៏ជ្រុលទៅបុ.ករថយន្តដឹកទំនិញពីក្រោយ បណ្ដាលអោយស្លា.ប់ភ្លាមៗនៅកន្លែងកើតហេតុ បង្កការភ្ញាក់ផ្អើលកាលពីវេលាម៉ោង៣ឈានចូលព្រឹកថ្ងៃទី២០ ខែកក្កដា ឆ្នាំ២០២៣ នៅចំណុចលើស្ពានច្បារអំពៅ ស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញបុរសរងគ្រោះជិះម៉ូតូហុងដាឌ្រីម ពណ៌ខ្មៅ ពាក់ផ្លាកលេខ ភ្នំពេញ 1GL-2637 ធ្វើដំណើរក្នុងល្បឿនលឿន ឡើងស្ពានច្បារអំពៅ ក្នុងទិសដៅពីលិចទៅកើតលុះមកដល់ចំណុចកើតហេតុ ក៏បានជ្រុលចង្កូតទៅបុ.ករថយន្តដឹកទំនិញ២តោនកន្លះ១គ្រឿង ដែលកំពុងសណ្តោងគ្នាលើស្ពាន បណ្តាលឲ្យស្លា.ប់ភ្លាមៗតែម្តង។
យោងតាមប្រភពបន្ថែមពីនារីជាសង្សារបានឲ្យដឹងថា មុនពេលកើតហេតុ ពួកគាត់ទាំង២បានឈ្លោះប្រកែកគ្នា អំឡុងពេលជិះម៉ូតូជាមួយគ្នា ហើយរូបនាងបានចុះពីលើម៉ូតូ ចំណែកខាងប្រុសអន់ចិត្តបានជិះម៉ូតូក្នុងល្បឿនលឿនឡើងស្ពាន ទើបបណ្តាលឲ្យជួបគ្រោះថ្នាក់បែបនេះ។
នៅក្នុងករណីនេះដែរ ប្រជាពលរដ្ឋបានឲ្យដឹងថា ម្ចាស់រថយន្តបានរត់គេចខ្លួនបាត់ បន្សល់ទុកតែរថយន្តនៅកណ្តាលស្ពានតែប៉ុណ្ណោះ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ទីតាំងកើតហេតុ និងបានទាក់ទងទៅកាន់សមត្ថកិច្ចជំនាញ ដើម្បីចុះមកធ្វើការវាស់វែង ព្រមទាំងយកយានយន្តទាំង២ទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំស្រាវជ្រាវរកម្ចាស់រថយន្ត ចាត់ការបន្តតាមនីតិវិធីនៅពេលក្រោយ៕
