សម្តេចតេជោ អំពាវនាវឲ្យជួយផ្សព្វផ្សាយឲ្យបានទូលំទូលាយ ពីវិស័យអប់រំបណ្តុះបណ្តាលបច្ចេកទេសជំនាញនិងវិជ្ជាជីវៈ

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអំពាវនាវឲ្យគ្រប់ស្ថានីយវិទ្យុ ទូរទស្សន៍របស់រដ្ឋ និងឯកជនព្រមទាំងប្រព័ន្ធផ្សព្វផ្សាយនានា សូមបន្តជួយផ្សព្វផ្សាយ​ឲ្យបាន​ទូលំទូលាយពីវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ ដើម្បីបង្កើនការយល់ដឹងអំពី​សារៈសំខាន់នៃវិស័យខាងលើនេះជូនដល់សាធារណជនបន្ថែមទៀត។ តាមរយៈសារលិខិតនៅក្នុងឱកាសទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៦ នាថ្ងៃទី១៥ ខែមិថុនា ឆ្នាំ២០២៣នេះក្រោមវិធានបទ«TVETផ្តល់ជំនាញ​ និងការងារសមរម្យ» សម្តេចតេជោ ហ៊ុន សែន ​បានលើកឡើងថា​ ការអប់រំបណ្តុះបណ្តាលបច្ចេកទេស និង​វិជ្ជាជីវៈ​គឺជាកត្តាសំខាន់បំផុតសម្រាប់ស្វែងរកឱកាសការងារ ខណៈកិច្ចការនេះរាជរដ្ឋាភិបាល​បានយកចិត្តទុកដាក់ខ្ពស់បំផុត ដោយចាប់ពីឆ្នាំ២០២៣នេះ​ទៅរាជរដ្ឋាភិបាលបាន​កំពុង​ផ្តល់អាហារូបករណ៍ ដល់យុវជនក្នុងគ្រួសារក្រីក្រ និងជនងាយរងគ្រោះនៅទូទាំងប្រទេសចំនួន ១លាន៥សែននាក់។ សម្តេចតេជោ ហ៊ុន សែន បានសង្កត់ធ្ងន់ថា«ក្រសួង ស្ថាប័នពាក់ព័ន្ធ អាជ្ញាធរគ្រប់លំដាប់ថ្នាក់ សាស្រ្តាចារ្យ លោកគ្រូ អ្នកគ្រូ សិក្ខាកាមសិស្សនិស្សិត មាតាបិតាអាណាព្យាបាល កម្មករនិយោជិត និយោជក ផ្នែកឯកជន អង្គការមិនមែនរដ្ឋាភិបាលដៃគូអភិវឌ្ឍន៍​ និងបងប្អូនជនរួមជាតិទាំងអស់ ចូលរួម​សហការផ្សព្វផ្សាយ​ទិវាជាតិអប់រំបណ្តុះបណ្តាលបច្ចេកទេស ​និងវិជ្ជាជីវៈលើកទី៦ ឆ្នាំ២០២៣ ក្រោមវិធានបទ«TVETផ្តល់​ជំនាញ​ និង​ការងារសមរម្យ»នេះ ឲ្យ​បាន​ផុលផុស​អធិកអធម​ទូទាំង​ប្រទេសតាមប្រព័ន្ធផ្សព្វផ្សាយនានា»។ ឆ្លៀតក្នុងឱកាសទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៦នេះដែរ ​សម្តចតេជោ ហ៊ុន សែន ​ក៏បាន​បន្តអំពាវនាវដល់បងប្អូនជនរួមជាតិទាំងអស់បន្តរួមគ្នា​ ថែរក្សាសន្តិភាព និងស្ថិរភាព​នៅកម្ពុជា ដែលជាលក្ខខណ្ឌចាំបាច់ក្នុងការបន្តការអភិវឌ្ឍមូលធនមនុស្ស ពោរពេញ​ដោយជំនាញ និងសមត្ថភាព ​ដើម្បីបង្កើន​ផលិតភាព ភាពប្រកួតប្រជែង កំណើនសេដ្ឋកិច្ចខ្ពស់ ការបង្កើតការងារថ្មីកាន់តែល្អ ​និងរក្សាការងារ ដែលមានស្រាប់​សំដៅបន្តលើកកម្ពស់​ជីវភាព​រស់នៅរបស់ប្រជាពលរដ្ឋឲ្យកាន់តែប្រសើរឡើងថែមទៀតផងដែរ។ បើតាមសារលិខិតនេះ សម្តេចតេជោ ហ៊ុន សែន ក៏បានឲ្យដឹងផងដែរថា​ ដើម្បីផ្តល់លទ្ធភាព ទទួលបានការងារបណ្តុះបណ្តាលប្រកបដោយសមធម៌ រាជរដ្ឋាភិបាលបានពង្រីក​ការផ្តល់​អាហារូបករណ៍ កាន់តែច្រើនឡើង សម្រាប់យុវជនដែលបានបោះបង់ការសិក្សា ​ប្រជាពលរដ្ឋក្រីក្រ ស្រ្តី ជនពិការ ជនជាតិ ដើមភាគតិច ​ជនងាយរងគ្រោះ និងកម្មករនិយោជិតក្នុងរយៈពេល៥ឆ្នាំ​មកនេះ​ មានសិក្ខាកាម សិស្ស និស្សិត និងកម្មករនិយោជិតប្រមាណ៣០ម៉ឺននាក់​បាន​ទទួលការបណ្តុះបណ្តាល​ និងបញ្ចប់ការសិក្សា ​ដោយជោគជ័យ ​ក្នុងការទទួលបានជំនាញថ្មី និង​លើកកម្ពស់ជំនាញរបស់ខ្លួន​ ដោយបានចាប់យកឱកាស​ ការងារល្អៗ ក៏ដូចជាការបង្កើត​មុខរបរ​ដោយខ្លួនឯង ក្នុងការបង្កើនប្រាក់ចំណូលក្នុងគ្រួសារ​ និងជួយលើក ស្ទួយសេដ្ឋកិច្ចជាតិ​បានយ៉ាងច្រើនផងដែរ៕