មន្ត្រីពេទ្យសត្វពិភពលោកនិងសហរដ្ឋអាម៉េរិកបាននិយាយថាវ៉ាក់សាំងប្រឆាំងនឹងជំងឺប៉េស្តជ្រូកអាហ្វ្រិកដែលកំពុងត្រូវបានធ្វើតេស្តិ៍នៅក្នុងប្រទេសវៀតណាមគឺជិតឈានដល់ការអនុម័តហើយ នៅក្នុងអ្វីដែលនឹងក្លាយជារបកគំហើញដ៏សំខាន់ដើម្បីដោះស្រាយជំងឺសត្វដ៏សាហាវ ដែលតែងតែបំផ្លាញកសិដ្ឋានចិញ្ចឹមជ្រូកទូទាំងពិភពលោក។
ជំងឺប៉េស្តជ្រូកអាហ្វ្រិកបានរំខានដល់ទីផ្សារសាច់ជ្រូកពិភពលោកតម្លៃ ២៥០ ពាន់លានដុល្លារអស់ជាច្រើនឆ្នាំមកហើយ។ នៅក្នុងការផ្ទុះឡើងដ៏អាក្រក់បំផុតក្នុងឆ្នាំ ២០១៨-១៩ប្រហែលពាក់កណ្តាលនៃចំនួនជ្រូកក្នុងស្រុកបានងាប់នៅក្នុងប្រទេសចិន ដែលជាអ្នកផលិតជ្រូកធំបំផុតរបស់ពិភពលោក ជាហេតុបណ្តាលឱ្យខាតបង់ប្រមាណជាង ១០០ ពាន់លានដុល្លារ។
លោក ហ្គ្រេហ្គោរីអូ ថូរ៉េស (Gregorio Torres)ប្រធាននាយកដ្ឋានវិទ្យាសាស្ត្រនៅអង្គការសុខភាពសត្វពិភពលោក (WOAH)បានប្រាប់ទីភ្នាក់ងារសារព័ត៌មានរ៉យទ័រក្នុងបទសម្ភាសន៍តាមទូរស័ព្ទថា បន្ទាប់ពីការប៉ុនប៉ងបរាជ័យជាច្រើនទសវត្សរ៍ដោយសារតែភាពស្មុគស្មាញនៃមេរោគវ៉ាក់សាំងចំនួនពីរដែលសហបង្កើតឡើងដោយអ្នកវិទ្យាសាស្ត្រអាម៉េរិកដែលកំពុងត្រូវបានសាកល្បងនៅក្នុងគម្រោងសាកល្បងដ៏ធំដោយក្រុមហ៊ុនវៀតណាម កំពុងបង្ហាញពីលទ្ធផល “គួរជាទីរំពឹង”។
លោកថូរ៉េសបាននិយាយថា “យើងមិនដែលជិតឈានដល់ការទទួលបានវ៉ាក់សាំងដែលអាចដំណើរការនោះទេ” ដោយកត់សម្គាល់ថា វ៉ាក់សាំងទាំងពីរ”ប្រហែលជាមានឱកាសខ្ពស់បំផុតក្នុងការទទួលបានជោគជ័យ” ហើយត្រូវបានអនុញ្ញាតឱ្យលក់នៅទូទាំងពិភពលោក។
វ៉ាក់សាំងទាំងពីរនេះបានទទួលការយល់ព្រមក្នុងប្រទេសវៀតណាមសម្រាប់ការប្រើប្រាស់សាកល្បងពាណិជ្ជកម្ម ដែលឥឡូវនេះបានបញ្ចប់ហើយ។ ជំហានបន្ទាប់គឺការអនុញ្ញាតទូទាំងប្រទេសជាលើកដំបូងមិនធ្លាប់មានសម្រាប់វ៉ាក់សាំងជំងឺប៉េស្តជ្រូកអាហ្វ្រិក និង លទ្ធភាពលក់នៅក្រៅប្រទេស។
រដ្ឋមន្ត្រីក្រសួងកសិកម្មអាម៉េរិក លោក ថូម៉ាស វីលស៊ែក (Thomas Vilsack) បាននិយាយថា ទំនងជាមានការចាប់អារម្មណ៍លើការទិញដោយប្រយ័ត្នប្រយែងនៅក្នុងសហរដ្ឋអាម៉េរិក បើទោះបីជាប្រទេសនេះបានរួចផុតពីមេរោគនេះមកទល់ពេលនេះក៏ដោយ។
លោកវីលស៊ែកបាននិយាយនៅក្នុងបទសម្ភាសន៍ជាមួយរ៉យទ័រកាលពីខែមេសា ដោយនិយាយអំពីលទ្ធភាពទិញវ៉ាក់សាំងថា “វានឹងមានការចាប់អារម្មណ៍ជាក់លាក់ជាមិនខាន”។
វ៉ាក់សាំងត្រូវបានធ្វើតេស្តិ៍នៅប្រទេសវៀតណាម កន្លែងដែលជំងឺប៉េស្តជ្រូកអាហ្វ្រិកគឺជាការគំរាមកំហែងឥតឈប់ឈរ ព្រោះវ៉ាក់សាំងមិនអាចបង្កើតនៅសហរដ្ឋអាម៉េរិកបានទេ ដោយសារវីរុសមិនមានវត្តមាននៅទីនោះ។
អង្គការ WOAH បាននិយាយនៅក្នុងរបាយការណ៍ធម្មតាមួយកាលពីសប្តាហ៍មុនថា ចាប់តាំងពីឆ្នាំ ២០២១ ជំងឺប៉េស្តជ្រូកអាហ្វ្រិកដែលមិនមានគ្រោះថ្នាក់ដល់មនុស្ស ត្រូវបានរាយការណ៍នៅក្នុងប្រទេសជិត ៥០ និងបណ្តាលឱ្យជ្រូកប្រហែល ១,៣ លានក្បាលងាប់៕
