(ភ្នំពេញ)៖ សុខសន្តិភាពដែលកំពុងគ្របដណ្តប់លើផ្ទៃប្រទេសកម្ពុជា បូករួមឆន្ទៈដឹកនាំដ៏មុតស្រូចរបស់រាជរដ្ឋាភិបាលកម្ពុជា មានសម្តេចតេជោ ហ៊ុន សែន ជាប្រមុខ បាននាំឱ្យ សមិទ្ធផលជាឧត្តមប្រយោជន៍សម្រាប់ជាតិ និងប្រជាជនកម្ពុជាកើតមានជាហូរហែ។ សមិទ្ធផលដ៏មានសារៈសំខាន់សម្រាប់ការធ្វើចរាចរណ៍របស់ប្រជាពលរដ្ឋនៅក្នុងរាជធានីភ្នំពេញចំនួនពីរទៀត គឺស្ពានឆ្លងទន្លេសាប និងស្ពានអាកាសឫស្សីកែវ នឹងត្រូវរៀបចំដាក់ឱ្យប្រើប្រាស់ជាផ្លូវការនៅថ្ងៃអង្គារ ១២កើត ខែជេស្ឋ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី៣១ ខែឧសភា ឆ្នាំ២០២៣នេះហើយ បន្ទាប់ពីដាក់ឱ្យប្រជាពលរដ្ឋឆ្លងកាត់បណ្តោះអាសន្នរយៈពេលជាងមួយខែមកនោះ។
ពិធីសម្ពោធស្ពានទាំងពីរនេះ នឹងប្រព្រឹត្តទៅក្រោមអធិបភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។ កំណើនប្រជាពលរដ្ឋ កំណើនការធ្វើចរាចរណ៍ក្រោមចរន្តចម្រើនលូតលាស់របស់សង្គមនោះ បានធ្វើឱ្យការធ្វើចរាចរណ៍ក្នុងរាជធានីភ្នំពេញ ជួបការកកស្ទះជាខ្លាំង។ ដោយមើលឃើញចរន្តកកស្ទះចរាចរណ៍ ធ្វើឱ្យរាជរដ្ឋាភិបាលកម្ពុជា ជាពិសេសរដ្ឋបាលរាជធានីភ្នំពេញ តែងបានគិតគូរ និងសិក្សារកវិធីរំដោះចរាចរណ៍ ដោយមានការសាងសង់ស្ពានអាកាស និងស្ពានឆ្លងកាត់ទន្លេក្នុងទឹកដីរាជធានីភ្នំពេញ ជាបន្តបន្ទាប់។ ស្ពានឆ្លងកាត់ទន្លេសាប និងស្ពានអាកាសឫស្សីកែវ គឺជាស្ពានដែលដើរតួនាទីយ៉ាងសំខាន់ សម្រាប់ការធ្វើដំណើររបស់ប្រជាពលរដ្ឋរវាងផ្លូវជាតិលេខ៥ និងលេខ៦ ក៏ដូចជាប្រជាពលរដ្ឋរស់នៅសងខាងនៃទន្លេសាប។
យោងតាមរបាយការណ៍របស់លោក ឃួង ស្រេង អភិបាលរាជធានីភ្នំពេញ បានឱ្យដឹងថា ស្ពានឫស្សីកែវឆ្លងកាត់ទន្លេសាប គឺជាប្រភេទស្ពានបេតុងខ្សែកាប តភ្ជាប់តំបន់អភិវឌ្ឍន៍ទីក្រុងរណបជ្រោយចង្វាមកកាន់ផ្លូវជាតិលេខ៥ ត្រង់ចំណុចប្រសព្វផ្លូវលេខ៣៦ ក្នុងខណ្ឌឫស្សីកែវ រាជធានីភ្នំពេញ។ ស្ពាននេះ ត្រូវបានបើកការដ្ឋានសាងសង់កាលពីថ្ងៃទី២៣ ខែតុលា ឆ្នាំ២០១៧ ក្រោមអធិបតីភាពរបស់សម្ដេចតជានាយករដ្ឋមន្ត្រី។ ការស្ថាបនាស្ពាននេះ បានប្រើរយៈពេលសាងសង់ជាង ៦៨ខែ ដោយចំណាយថវិកាអស់ចំនួន ៣៥លានដុល្លារអាមេរិកដែលជាកញ្ចប់ថវិកា បានមកពីមូលនិធិតំបន់អភិវឌ្ឍន៍ជ្រោយចង្វារបស់ក្រុមហ៊ុនវិនិយោគទុនអាណិកជនកម្ពុជា (OCIC)។ ស្ពាននេះមានប្រវែង ៥១០ម៉ែត្រ ទទឹង ២០.៥ ម៉ែត្រ និងមានបណ្តោយស្ពានសរុបប្រវែង ៩២២ ម៉ែត្រ។ គន្លងផ្លូវរត់របស់តួស្ពាន មានចំនួន ៦គន្លង សម្រាប់ចរាចរទ្វេទិស ៣ គន្លងទៅ និង៣គន្លងមក។ ក្នុងនោះ គន្លងផ្លូវរត់ម្ខាងៗ មាន ២គន្លង សម្រាប់រថយន្ត និង ១គន្លង សម្រាប់ទោចក្រយានយន្ត។ ស្ពាននេះ មានសសរសម្រាប់ព្យួរខ្សែកាបកម្ពស់ ៤០ម៉ែត្រ និងមានសសរស្ពានចំនួន ៤ ដើម មានរាងអដ្ឋកោនក្នុងនោះ ចន្លោះសសរពីមួយទៅមួយមានគម្លាតអប្បបរមា ៧២ម៉ែត្រ និងអតិបរមា ១២០ម៉ែត្រ ហើយសសរស្ពាននីមួយៗត្រូវខួងគ្រឹះសសរ ដែលមានអង្កត់ផ្ចិតទំហំ ២ម៉ែត្រ ជម្រៅចន្លោះពី ៣៣ម៉ែត្រ ទៅ៦២ម៉ែត្រ។ ស្ពាននេះ មានជម្រាលបណ្ដោយស្ពាន ៥ភាគរយ និងជម្រាលទទឹងស្ពាន ២ភាគរយ ដោយកំណត់ល្បឿនយានយន្តបើកបរលើស្ពាន ៤០ គីឡូម៉ែត្រក្នុង១ម៉ោង និងមានកម្ពស់អតិបរមាអនុញ្ញាតឱ្យនាវាឆ្លងកាត់ក្រោមស្ពាន ១០.៥ម៉ែត្រ នៅរដូវវស្សា និង ២០.៥ម៉ែត្រនៅរដូវប្រាំង។ ក្រៅពីសំណង់តួស្ពាន និងផ្លូវតភ្ជាប់ក្បាលស្ពានហើយនោះ ក៏នៅមានហេដ្ឋារចនាសម្ព័ន្ធមួយចំនួន ដែលត្រូវបំពាក់ភ្ជាប់ក្នុងគម្រោងនេះ រួមមាន ការបំពាក់បង្គោលភ្លើងបំភ្លឺផ្លូវ, ការរៀបចំបណ្តាញលូររមសងខាងផ្លូវក្បាលស្ពាន, ការដាក់ស្លាកសញ្ញាចរាចរ និងការលាបគំនូសចរាចរក្នុងតំបន់ការដ្ឋាន។
ក្រោយការសាងសង់រួចរាល់ជាស្ថាពរ ដោយមានគោលការណ៍អនុញ្ញាតពី សម្ដេចតេជោនាយករដ្ឋមន្ត្រី រដ្ឋបាលរាជធានីភ្នំពេញ បានដាក់ឱ្យបងប្អូនប្រជាពលរដ្ឋ និងអ្នកដំណើរទាំងឡាយបានប្រើប្រាស់ជាបណ្ដោះអាសន្នស្ពានឫស្សីកែវឆ្លងកាត់ទន្លេសាប ចាប់តាំងពីថ្ងៃទី១០ ខែមេសា ឆ្នាំ២០២៣ រហូតមកដល់ពេលនេះ។ ដោយឡែកស្ពានអាកាសឫស្សីកែវវិញ មានទីតាំងស្ថិតតាមបណ្ដោយផ្លូវជាតិលេខ៥ ត្រង់ចំណុចប្រសព្វផ្លូវលេខ ៣៦ក្នុងខណ្ឌឫស្សីកែវ រាជធានីភ្នំពេញ។ ស្ពាននេះ ត្រូវបានបើកការដ្ឋានសាងសង់កាលពីថ្ងៃទី៣១ ខែមករា ឆ្នាំ២០២២ ក្រោមអធិបតីភាពរបស់សម្ដេចតេជោនាយករដ្ឋមន្ត្រី។ ស្ពាននេះ បានប្រើរយៈពេលសាងសង់ជាង ១៦ខែ។ ក្នុងនោះ ក្រោយការសាងសង់រួចរាល់ជាស្ថាពរ និងមានគោលការណ៍អនុញ្ញាតពី សម្ដេចតេជោនាយករដ្ឋមន្ត្រី រដ្ឋបាលរាជធានីភ្នំពេញ បានដាក់ឱ្យប្រជាពលរដ្ឋ និងអ្នកដំណើរទាំងឡាយបានប្រើប្រាស់ជាបណ្ដោះអាសន្ន ចាប់តាំងពីថ្ងៃទី១ ខែមីនាឆ្នាំ២០២៣ រហូតមកដល់ពេលនេះ។ ស្ពានអាកាសឫស្សីកែវ បានចំណាយថវិកាសាងសង់អស់ចំនួន ៩,៧១០,៤៧៤ដុល្លារអាមេរិក ជាកញ្ចប់ថវិកាបានមកពីមូលនិធិអភិវឌ្ឍន៍កោះនរា របស់ក្រុមហ៊ុនវិនិយោគទុនអាណិកជនកម្ពុជា (OCIC)។ ស្ពាននេះ គឺជាស្ពានអាកាសទី៦ ដែលបានស្ថាបនារួចរាល់ ក្រោមកិច្ចសហប្រតិបត្តិការរវាងរដ្ឋបាលរាជធានីភ្នំពេញ និងវិស័យឯកជន ស្របតាមអនុសាសន៍ និងចំណាត់ការដ៏ម៉ឺងម៉ាត់របស់សម្ដេចតេជោនាយករដ្ឋមន្ត្រី នោះគឺ «ការយកទីក្រុងចិញ្ចឹមទីក្រុង ឬយកស្លឹកត្នោតខ្ចប់ស្ករត្នោត»។ ស្ពានអាកាសឫស្សីកែវ មានទទឹងទំហំ ១៥.៨ម៉ែត្រ បណ្តោយតួស្ពានប្រវែង ១៤៥ម៉ែត្រ និងស្ថាបនាផ្លូវតភ្ជាប់ក្បាលស្ពានផ្នែកខាងជើងប្រវែង ១៥៧ ម៉ែត្រ និងផ្នែកខាងត្បូងប្រវែង ១៨១ម៉ែត្រ សរុបមានប្រវែង ៤៨៣ម៉ែត្រ។ គន្លងផ្លូវរត់របស់តួស្ពាន មានទទឹង ៣.២៥ម៉ែត្រ បូក ៣.៥០ម៉ែត្រ សម្រាប់ចរាចរទ្វេទិស បែងចែកជា ២គន្លងរថយន្តទៅ និង ២ គន្លងរថយន្តមក។នៅផ្នែកខាងក្រោមស្ពានអាកាស បានស្ថាបនាពង្រីកតួផ្លូវចំនួន ៣ខ្សែ រួមមាន ផ្លូវឯកទិស មានទិសដៅតាមបណ្តោយផ្លូវជាតិលេខ៥ ឆ្ពោះទៅស្ពានព្រែកព្នៅ, ផ្លូវឯកទិសមានទិសដៅតាមបណ្តោយផ្លូវជាតិលេខ៥ ឆ្ពោះទៅស្ពានជ្រោយចង្វា និងផ្លូវទ្វេទិសមានទិសដៅឆ្លងកាត់ផ្លូវជាតិលេខ៥ ឆ្ពោះទៅមកស្ពានឫស្សីកែវ។ ស្ពាននេះមានជម្រាលបណ្តោយស្ពាន ៥ភាគរយ និងជម្រាលទទឹងស្ពាន ២ភាគរយ ដោយកំណត់ល្បឿនយានយន្តបើកបរលើស្ពាន ៤០គីឡូម៉ែត្រក្នុង១ម៉ោង និងមានកម្ពស់សុវត្ថិភាព ៥ម៉ែត្រ សម្រាប់ផ្លូវឆ្លងកាត់ផ្នែកខាងក្រោមស្ពានអាកាស។ ក្រៅពីសំណង់តួស្ពាន និងផ្លូវតភ្ជាប់ក្បាលស្ពាន ក៏នៅមានហេដ្ឋារចនាសម្ព័ន្ធមួយចំនួន ដែលត្រូវបំពាក់ភ្ជាប់ក្នុងគម្រោងនេះ រួមមាន ការបំពាក់បង្គោលភ្លើងបំភ្លឺផ្លូវ, ការដាក់ស្លាកសញ្ញាចរាចរ, ការលាបគំនូសចរាចរ, ការរៀបចំបណ្តាញលូររមសងខាងផ្លូវ និងការកែសម្រួលចិញ្ចើមផ្លូវក្នុងតំបន់ការដ្ឋាន។
ការស្ថាបនាស្ពានឫស្សីកែវឆ្លងកាត់ទន្លេសាប ទន្ទឹមគ្នាទៅនឹងការស្ថាបនាស្ពានអាកាសឫស្សីកែវ ដោយផ្សារភ្ជាប់ទៅនឹងហេដ្ឋារចនាសម្ព័ន្ធស្ពានភ្លោះជ្រោយចង្វា គឺជាតភ្ជាប់ប្រព័ន្ធឡូជីស្ទិករវាងផ្លូវជាតិលេខ៥ និងផ្លូវជាតិលេខ៦ ដែលនឹងធ្វើឱ្យតំបន់នេះ ជាពិសេសតំបន់ឫស្សីកែវ និងតំបន់អភិវឌ្ឍន៍ជ្រោយចង្វា កាន់តែមានសក្តានុពលក្នុងការអភិវឌ្ឍលើគ្រប់វិស័យ ជាពិសេសរួមចំណែកយ៉ាងសំខាន់ ក្នុងការសម្រួលដល់ការធ្វើដំណើររបស់បងប្អូនប្រជាពលរដ្ឋ ឆ្លងកាត់ទៅមកចេញ-ចូលរាជធានីភ្នំពេញ បញ្ចៀសការកកស្ទះរយៈពេលយូរ និងជាសរសៃឈាមយុទ្ធសាស្ត្រដ៏សំខាន់ ដែលនាំមកនូវកំណើនសេដ្ឋកិច្ច និងលើកកម្ពស់វិស័យទេសចរណ៍ ទាំងក្នុងក្របខ័ណ្ឌរាជធានីភ្នំពេញ ក៏ដូចជាទូទាំងប្រទេសកម្ពុជា។
នេះជាសមិទ្ធផលថ្មី និងជាប្រវត្តិសាស្ត្រថ្មីទៀតលើទឹករាជធានីភ្នំពេញនិយាយដោយឡែក និងនិយាយជារួមសម្រាប់ប្រទេសកម្ពុជាទាំងមូល ក្រោមការដឹកនាំរបស់រាជរដ្ឋាភិបាលមានសម្តេចតេជោ ហ៊ុន សែន ជាប្រមុខ។ សមិទ្ធផលនេះ កើតមានទៅបានក៏ដោយសារកម្ពុជារក្សាបាននូវសុខសន្តិភាពពេញលេញ គ្មានភ្លើងសង្គ្រាម និងមានការឯកភាពជាតិ ឯកភាពទឹកដីរយៈពេលជាង ២០ឆ្នាំមកនេះ។ ក្រៅតែពីសុខសន្តិភាពហើយនោះ សមិទ្ធផលនេះ បានឆ្លុះបង្ហាញឱ្យឃើញស្មារតី និងឆន្ទៈនៃការដឹកនាំរបស់រាជរដ្ឋាភិបាល ដែលតែងតែតម្កល់ប្រយោជន៍ជាតិ និងប្រជាជនជាចម្បង។ ប្រជាពលរដ្ឋខ្មែរ ជាពិសេសអ្នករស់នៅក្នុងរាជធានីភ្នំពេញ បានសម្តែងការសាទរយ៉ាងខ្លាំងចំពោះសមិទ្ធផលដ៏វិសេសវិសាលនេះ៕
