(ភ្នំពេញ)៖ ស៊ីហ្គេមបានបិទបញ្ចប់ជាផ្លូវការ នាយប់ថ្ងៃទី១៧ ឧសភា ក្រោមអធិបតីភាពដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ។ ភាពជាម្ចាស់ផ្ទះ លោក ថោង ខុន អនុប្រធានអចិន្ត្រៃយ៍ គណៈកម្មាធិការជាតិរៀបចំ ស៊ីហ្គេមលើកទី៣២ បានបញ្ជាក់ថាៈ អត្តពលិកទាំង ១១ ប្រទេស ដែលចូលប្រកួត ក្នុងព្រឹត្តិការណ៍ស៊ីហ្គេមនេះ ប្រតិបត្តិបានយ៉ាងល្អ ស្របតាមគុណតម្លៃអូឡាំពិក។ អត្តពលិកទាំងអស់ សុទ្ធតែបានបង្ហាញគុណតម្លៃអូឡាំពិក គឺការគោរព (Respect) មិត្តភាព (Friendship) និងសាមគ្គីភាព (Solidarity) ឆ្លុះបញ្ចាំងពីសារៈ សំខាន់ នៃគុណតម្លៃរបស់ចលនា និងស្មារតីអូឡាំពិក។
អត្តពលិកទាំងអស់ ជាគំរូដ៏ពិសេសដែលបានប្រកួតប្រជែងគ្នា ដោយយុត្តិធម៌ ដោយគោ រពដល់ប្រទេសជិតខាង ក្នុងតំបន់អាស៊ីអាគ្នេយ៍ ហើយបានបន្តជាគំរូដ៏ល្អប្រសើរ នៃការប្រកួតកីឡាអាស៊ីអាគ្នេយ៍ ផ្អែកលើគោលការណ៍ Fair-Pla (ប្រកួតដោយ យុត្តិធម៌)។ សម្តេចតេជោ ហ៊ុន សែន នាយករដ្ឋមន្ត្រី បានផ្តល់ដល់ប្រតិភូកីឡាទាំងអស់ ក្នុងការស្នាក់នៅ ហូបចុក និងដឹកជញ្ជូន ការផ្តល់សិទ្ធិផ្សព្វផ្សាយ និងផ្តល់សំបុត្រ ចូលទស្សនា គ្រប់ប្រភេទកីឡា និងក្នុងពិធីបើក-បិទជាផ្លូវការ ព្រមជាមួយការចូល ទស្សនា ប្រាសាទអង្គវត្ត ដោយឥតគិតថ្លៃ កម្ពុជាបានយកចិត្តទុកដាក់ សាងសង់ ភូមិកីឡា ដែលបានបញ្ជាក់យ៉ាងច្បាស់ ពីស្មារតីខិតខំរបស់ម្ចាស់ផ្ទះ ក្នុងការទទួលរៀបចំ ព្រឹត្តិការណ៍កីឡាអាស៊ីអាគ្នេយ៍ ស្របតាមគោលការណ៍អូឡាំពិក ដែលអនុញ្ញាត ឱ្យប្រតិភូកីឡា និងអត្តពលិកទាំង ១១ប្រទេស មករួមរស់ជុំគ្នា ជាសហគមន៍គ្រួសារ ស៊ីហ្គេម និងផ្ដល់ឱកាសក្នុងការចែករំលែក បទពិសោធន៍ល្អៗ បង្កើតមិត្តភាព និង សាមគ្គីភាព ស្របនឹងអត្ថន័យ គឺកីឡាមិនត្រឹមតែជាការប្រកួត និងការដណ្ដើមមេដាយ ប៉ុណ្ណោះទេ ប៉ុន្តវាមានអត្ថន័យលើសពីការប្រកួត និងមេដាយ Beyond the Games and Medals។លោក ថោង ខុន បានបន្តថាៈ ប្រការគួរឱ្យចងចាំដែលត្រូវបានដាក់បញ្ចូល ក្នុងកំណត់ត្រា នៃប្រវត្តិកីឡាអាស៊ីអាគ្នេយ៍ គឺសមាជិកក្រុមប្រឹក្សាកីឡាអាស៊ីអាគ្នេយ៍ ទាំងអស់ បានសម្តែងការអបអរសាទរ ព្រឹត្តិការណ៍កីឡាអាស៊ីអាគ្នេយ៍ លើកទី៣២ ដែលជាប្រវត្តិសាស្ត្ររបស់កម្ពុជា ក្នុងរយៈពេល ៦៤ ឆ្នាំ ដោយបានចូលរួមសហការ យ៉ាងស្អិតល្មួត ក្នុងដំណើរដង្ហែរត់ភ្លើងគប់ ឆ្លងកាត់ប្រទេសរបស់ខ្លួន។
ទាំងអស់គ្នា មានក្តីសប្បាយរីករាយណាស់ ដោយបានឃើញភ្លើងគប់ ធ្វើដំណើរឆ្លង កាត់តំបន់អាស៊ីអាគ្នេយ៍ ដែលជាសញ្ញានៃកម្លាំងសាមគ្គីភាព មិត្តភាព និងសហប្រតិបត្តិការល្អ ក្នុងមហាគ្រួសារចលនាអូឡាំពិកតំបន់ និងជាសក្ខីភាព នៃការគាំទ្រ យ៉ាងពេញទំហឹងដល់កម្ពុជា ក្នុងនាមជាម្ចាស់ផ្ទះ។ ពេលភ្លើងគប់ ត្រឡប់ដល់កម្ពុជាវិញ យើងក៏ឃើញមានមនុស្សចូលរួមដង្ហែ អបអរសាទរតាមដងផ្លូវ យ៉ាងច្រើនកុះករ ដែលជាសញ្ញានៃការគាំទ្រ ដល់ព្រិត្តិការណ៍កីឡាអាស៊ីអាគ្នេយ៍។ ព្រឹត្តិការណ៍កីឡាដ៏មានសារៈសំខាន់នេះ មិនត្រឹមតែផ្ដល់ឱកាសដល់អត្តពលិកទាំងអស់ ក្នុងការប្រកួតតំណាងជាតិ របស់ខ្លួនប៉ុណ្ណោះទេ ប៉ុន្តែក៏បានបង្ហាញពីគុណតម្លៃនៃ ឧត្តមភាព មិត្តភាព និងសាមគ្គីភាព របស់សមាជិកគ្រួសារ កីឡាអាស៊ីអាគ្នេយ៍ ក៏ដូចជា ទិដ្ឋភាពគ្រប់រសជាតិ ដែលមានទាំងភាពរីករាយ និងរំជួលចិត្តរហូតស្រក់ទឹកភ្នែក៕
