(បារាំង) ៖ យោងតាមការបង្ហោះដោយអ្នកកាសែតជនជាតិអ៊ីតាលី លោក Fabrizio Romano កាលពីថ្ងៃទី០៤ ខែមេសា កន្លងទៅ បាននិយាយអំពីជម្រើសចំនួន៣សម្រាប់អនាគតកំពូលខ្សែប្រយុទ្ធ Lionel Messi ដែលអាចមិនមែនជាការបន្តកុងត្រាថ្មីជាមួយក្រុម Paris Saint-Germain ឬការវិលត្រឡប់ទៅចូលរួមជាមួយក្រុម FC Barcelona វិញនោះទេ។អ្នកកាសែតកីឡាដ៏ល្បីឈ្មោះរូបនេះ គឺជាមនុស្សម្នាក់ដែលបានចែករំលែកព័ត៌មានមួយចំនួនកាលពីថ្ងៃទី០៤ មេសា កន្លងទៅ ហើយបានផ្តល់ព័ត៌មានលម្អិតបន្ថែមនៅលើបណ្តាញធ្វីតធឺរបស់ខ្លួន (Twitter)។
អ្វីដែលធ្វើឱ្យគ្រប់គ្នាមានការចាប់អារម្មណ៍ចំពោះអំណះអំណាងនៃជម្រើសទី៣នោះគឺ ក្លិប Al Hilal ដែលជាគូប្រជែងដ៏ធំបំផុតរបស់ក្លិប Al Nassr នៅលីគកំពូលអារ៉ាប៊ីសាអូឌីត (Saudi Pro League) ដែលបច្ចុប្បន្នកំពូលខ្សែប្រយុទ្ធ Cristiano Ronaldo កំពុងប្រកបអាជីពនៅទីនោះ បានដាក់សំណើជាមួយការផ្តល់ជូនថ្លៃពលកម្មដ៏មហាសាលដើម្បីនាំយក Lionel Messi ទៅប្រកបអាជីពនៅប្រទេសស្ថិតក្នុងតំបន់អាស៊ីខាងលិចមួយនេះ។របាយការណ៍របស់លោក Fabrizio Romano បានបង្ហាញថាក្លិប Al Hilal បានដាក់សំណើជាមួយការផ្ដល់ជូនតម្លៃពលកម្មដល់កំពូលខ្សែប្រយុទ្ធ Lionel Messi ដែលមានតម្លៃដល់ ៤០០លានអឺរ៉ូក្នុងមួយរដូវកាល ដែលស្មើប្រមាណ ៤៣៨លានដុល្លារអាមេរិកពោលគឺច្រើនជាងពាក់កណ្តាលនៃចំនួនដែលក្លិប Al Nassr ផ្តល់ឱ្យកំពូលខ្សែប្រយុទ្ធ Cristiano Ronaldo។ក្លិប Al Hilal គឺជាក្លិបបាល់ទាត់ដែលគ្រប់គ្រងដោយរដ្ឋ ដែលសុខចិត្តចំណាយប្រាក់យ៉ាងច្រើនសន្ធឹកសន្ធាប់សម្រាប់ Messi ហើយជាមួយនឹងចំនួនទឹកប្រាក់ដ៏មហាសាលនេះ នឹងធ្វើឱ្យប្រធានក្រុមជម្រើសជាតិអាហ្សង់ទីនរូបនេះ ក្លាយជាកីឡាករមានថ្លៃពលកម្មច្រើនបំផុតមិនធ្លាប់មានក្នុងប្រវត្តិសាស្ត្របាល់ទាត់។ ភាគរយច្រើនណាស់ ដែលបង្ហាញថា Messi ដែលសល់កុងត្រាត្រឹមចុងខែមិថុនា ឆ្នាំ២០២៣ ទំនងជាមិនបន្តកុងត្រាថ្មីជាមួយក្លិប PSG ទៀតនោះទេ ដោយសារតែកាលពីថ្មីៗនេះ អ្នកគាំទ្រក្លិបអ្នកមានបារាំងមួយនេះ បានធ្វើការស្រែកចំអក (Boo) ដាក់កីឡាករ Messi ពេញកីឡដ្ឋានអំឡុងពេលការប្រកួត ខណៈដែលពួកគេសម្តែងការមិនពេញចំពោះវត្តមានកីឡាករឆ្នើមរូបនេះ ដែលនៅតែមិនអាចជួយក្រុមឈ្នះពានរង្វាន់ UEFA Champions League បាន។ទន្ទឹមជាមួយគ្នានោះ ក៏មានព័ត៌មានជាច្រើនលើកឡើងថាក្លិប Barcelona កំពុងព្យាយាមនាំយកខ្សែប្រយុទ្ធរូបនេះ វិលត្រឡប់មកកាន់ទឹកដី Camp Nou វិញនៅរដូវកាលក្រោយ។ ប៉ុន្តែទោះយ៉ាងណា គេមើលឃើញថា រឿងនេះទំនងជាពិបាកកើតឡើង ដោយសារបច្ចុប្បន្នក្លិបយក្សតំបន់កាតាឡាន់មួយនេះ កំពុងស្ថិតក្រោមការស៊ើបអង្កេតពីរដ្ឋអាជ្ញាអេស្ប៉ាញជុំវិញបទចោទប្រព្រឹត្តអំពើពុករលួយ ដោយបានសូកប៉ាន់អតីតអនុប្រធានគណៈកម្មាធិការបច្ចេកទេសអាជ្ញាកណ្តាល លោក Jose Maria Enriquez Negreira ជាមួយទឹកប្រាក់រាប់លានអឺរ៉ូ អំឡុងពេលការគ្រប់គ្រងរបស់អតីតប្រធានក្លិប លោក Josep Bartomeu៕
