ខេត្តព្រះសីហនុ៖ យ៉ាងហោច មានមនុស្សចំនួន ៤នាក់ បានរងរបួសធ្ងន់ស្រាល ក្នុងហេតុការណ៍រថភ្លើងបុកប៉ះជាមួយរថយន្ត ឆ្លងកាត់ផ្លូវដែក លើដងផ្លូវដែក នៅចំណុចផ្លូវលំឡើងថ្មដំរី ស្ថិតនៅក្នុងភូមិព្រែកប្រស់ ឃុំទឹកថ្លា ស្រុកព្រៃនប់ ខេត្តព្រះសីហនុ។
ហេតុការណ៍នេះ បានកើតឡើង កាលពីម៉ោង ៣ និង ៣០នាទី រសៀលថ្ងៃទី២១ ខែមីនា ឆ្នាំ២០២៣។
លោកវរសេនីយ៍ឯក អ៊ួង វុទ្ធី អធិការនគរបាលស្រុកព្រៃនប់ បានឲ្យដឹងជាបឋមថា ករណីគ្រោះថ្នាក់ចរាចរណ៍នេះ បណ្តាលអោយមានមនុស្ស រងបួសធ្ងន់ និងស្រាល ចំនួន ០៤នាក់។ ក្នុងនោះ ភាគីខាងរថយន្ត របួសធ្ងន់ស្រាលចំនួន ពីរនាក់ និងភាគីខាងរថភ្លើង របួសធ្ងន់ស្រាល ចំនួនពីរនាក់។
រថភ្លើង បើកបរក្នុងទិសដៅពីខេត្តព្រះសីហនុ ទៅភ្នំពេញ។ រីឯរថយន្ត ឆ្លងផ្លូវដែក ពីលិច ទៅកើត ហើយហេតុការណ៍នេះ កើតឡើង ក្នុងខណៈពេលដែលរថយន្ត ឆ្លងជិតផុតផ្លូវដែក៕ 
