(ភ្នំពេញ)៖ ប្រធានសមាគមសហគ្រិនស្រ្តីកម្ពុជា លោកស្រី កែវ មុំ បានលើកឡើងក្នុងកិច្ចសម្ភាសន៍ ជាមួយអ្នកយកព័ត៌មាន ស្តីពី ការអភិវឌ្ឍខ្សែច្រវ៉ាក់ផលិតកម្ម របស់សហគ្រិនជាស្រ្តីថា ការប្រកបមុខរបររកស៊ីទទួលទាន របស់សហគ្រិនជាស្រ្តី នៅក្នុងឆ្នាំ២០២២កន្លងទៅ គឺនៅមានកម្រិតនៅឡើយ នៅក្នុងការផលិត និងការលក់ផលិតផលរបស់ខ្លួន នៅតាមទីផ្សារ បន្ទាប់ពីវិបត្តិកូវីដ-១៩ បានកើតឡើង។
លោកស្រីប្រធានសមាគម បានរំពឹងខ្ពស់ថា នៅឆ្នាំ២០២៣ នៅក្នុងខ្សែច្រវ៉ាក់ផលិតកម្មក្នុងស្រុក ទាំងដំណើរការផលិត និងវេចខ្ចប់ចំណីអាហារ នឹងមានការងើបឡើងកាន់តែល្អប្រសើរ ដែលគាំទ្រដោយការងើបឡើងនៃវិស័យចរណ៍ និងស្របពេលដែលប្រទេសចិន បានបើកប្រទេសទូលាយឡើងវិញ ក្រោយពីបានបិទ ដោយសារការរាតត្បាតខ្លាំង ពីជំងឺកូវីដ-១៩។ ទាក់ទងការផលិត និងវេចខ្ចប់នេះ, ស្របពេលកម្ពុជាមានការរំពឹង នៃការងើបឡើងនូវស័យទេសចរណ៍ ក្នុងឆ្នាំនេះ និងស្របពេលដែលចិន បានបើកប្រទេសទូលាយឡើងវិញ, លោកស្រី ក៏បានថ្លែងនូវការសប្បាយចិត្តយ៉ាងខ្លាំង និងមានក្តីរំពឹងថា វិស័យសហគ្រាសធុនតូច និងមធ្យម ជាពិសេសវិស័យដែលគ្រប់គ្រងដោយស្រ្តី និងអាចងើបឡើងល្អប្រសើរវិញ ទាំងនៅក្នុងខ្សែច្រវ៉ាក់ផលិតកម្ម ការវេចខ្ចប់ និងការចែកចាយនៅលើទីផ្សារ ដែលជាផ្នែកមួយជួយលើកកម្ពស់ដល់សហគ្រិនស្រ្តី ឬស្រ្តីដែលប្រកបអាជីវកម្ម មានលទ្ធិភាពពង្រីកមុខរបរ និងការស្វែងរកប្រាក់ចំណូលកាន់តែប្រសើរ។
លោកស្រី កែវ មុំ ក៏បានអំពាវនាវ ឲ្យសហគ្រិនទាំងអស់ ជាពិសេសសហគ្រិនស្ត្រីកម្ពុជា ពង្រឹងសមត្ថភាព និងពង្រីកអាជីវកម្មរបស់ខ្លួន នៅក្នុងឆ្នាំថ្មីនេះ ខណៈកម្ពុជា ជាប្រទេសមានសក្តានុពល ដែលវិនិយោគិននៅតាមបណ្តាប្រទេសជាច្រើន កំពុងសំលឹងមើល ក្នុងការវិនិយោគ។
សូមបញ្ជាក់ថា នៅក្នុងរយៈពេល១១ខែ ឆ្នាំ២០២២កន្លងទៅ បើយោងតាមរបាយការណ៍ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ទទួលបានការចុះបញ្ជីសហគ្រាសធុនតូច និងមធ្យម មានចំនួនជាង១ពាន់មូលដ្ឋាន ដែលចំនួននេះ បានកើនឡើងខ្ពស់ បើធៀបរយៈពេលដូចគ្នាក្នុងឆ្នាំ២០២១៕
