(ភ្នំពេញ)៖ ឯកឧត្តម ហ៊ុន ម៉ានី បានសម្តែងប្រតិកម្ម និងមិនអាចទទួលយក បាននោះឡើយ ចំពោះសម្តីបុគ្គល សុគន្ធារៈ ឡុង ជាបរិវាទណ្ឌិត សម រង្ស៉ី ចំពោះការប្រើប្រាស់ពាក្យសម្តីប្រមាថយ៉ាងអសុរោះ ប៉ះពាល់ដល់សេចក្តី ថ្លៃថ្នូ និងកិត្តិយសរបស់ឯកឧត្តមបណ្ឌិត ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក។
សុគន្ធារៈ ឡុង អតីតព្រះសង្ឃខ្មែរ ដែលត្រូវបានគេធានាទៅនៅអាមេរិកនោះ បាននិងកំពុងក្លាយទៅជាបរិវារបស់ក្រុមប្រឆាំង និងជាក្រុមឧទ្ទាមក្រៅច្បាប់ដឹកនាំដោយជនក្បត់ជាតិតជំនាន់ សម រង្ស៉ី។ ជននេះ បានកំពុងធ្វើសកម្មភាពវាយប្រហារលើថ្នាក់ដឹកនាំ រាជរដ្ឋាភិបាលយ៉ាងខ្លាំងក្លា ដើម្បីបំពេញចិត្តក្រុមឧទ្ទាមក្រៅប្រទេស។
នៅពេលថ្មីៗនេះ ក្រុមជនឧទ្ទាមក្រៅច្បាប់រូបនេះ បានប្រើឯកសណ្ឋានកងយោធពលខេមរភូមិន្ទ ហើយប្រើប្រាស់ពាក្យសម្តីអសុរោះ និងគ្មានអសីលធម៌វាយប្រហារទៅលើលោកបណ្ឌិត ហ៊ុន ម៉ាណែត។
នៅរសៀលថ្ងៃចន្ទ ទី២៣ ខែមករា ឆ្នាំ២០២៣នេះ ឯកឧត្តម ហ៊ុន ម៉ានី ជាអ្នកតំណាងរាស្ត្រវ័យក្មេងនៅក្មេងនៅកម្ពុជា និងជាប្អូនប្រុសបង្កើតរបស់ឯកឧត្តម ហ៊ុន ម៉ាណែត បានប្រតិកម្មជាខ្លាំងទៅនឹងសម្តីនោះ។
ឯកឧត្តម ហ៊ុន ម៉ានី បានគូសរំលេចទំព័រហ្វេសប៊ុកយ៉ាងដូច្នេះ «នេះជាការប្រមាថ ដែលមិនអាចទទួលយកបាន។ ក្នុងនាមជាប្អូន ពាក្យសំដីដ៏ព្រហើន គ្មានមូលដ្ឋាន និងអសុរសនេះ បានប៉ះពាល់មកដល់អារម្មណ៍ និងមនោសញ្ចេតនាខ្ញុំផ្ទាល់ ដែលជាសមាជិកគ្រួសារតែមួយ»។
ជាមួយប្រតិកម្មនេះ ឯកឧត្តម ហ៊ុន ម៉ានី បានអំពាវនាវឱ្យសមត្ថកិច្ច ចាត់វិធានការច្បាប់លើជនខិលខូចម្នាក់នេះ ដែលហ៊ានយកឯកសណ្ឋានយោធា មកពាក់ដោយខុសច្បាប់ និងប្រើប្រាស់ពាក្យពេចន៍គ្មានមូលដ្ឋាន ដែលប៉ះពាល់យ៉ាងធ្ងន់ធ្ងរ លើកិត្តិយសបុគ្គលផង និងកិត្តិយសនៃស្ថាប័នជាតិ។
បុគ្គល សុគន្ធារៈ ឡុង នេះ បើទោះបីជាមនុស្សធ្លាប់បួសរៀន តែគ្មានតម្លៃផ្នែកសីលធម៌នោះឡើយ។ ព្រោះចង់បានសមានចិត្តពីក្រុមប្រឆាំងក្រៅប្រទេសដឹកនាំដោយទណ្ឌិត សម រង្ស៉ី គេបានប្រកាសកាត់កាលម្តាយ និងសាច់ញាតិរបស់ខ្លួន ដែលគាំទ្ររាជរដ្ឋាភិបាល និងគណបក្សប្រជាជនកម្ពុជា។
សម្តីគ្មានសីលធម៌របស់បរិវាក្រុមឧទ្ទាម សុគន្ធារៈ ឡុង ក៏បានធ្វើឱ្យមានប្រតិកម្មជាច្រើនពីអ្នកលេងបណ្តាញសង្គមហ្វេសប៊ុក និងចង់ឃើញប្រព័ន្ធច្បាប់ចាត់វិធានការច្បាប់ចំពោះជននេះ៕
