ប៉ៃលិន៖ រសៀលថ្ងៃទី០៤ ខែធ្នូ ឆ្នាំ២០២២ លោកជំទាវ បាន ស្រីមុំ ប្រធានគណៈកម្មាធិការគណបក្សខេត្តប៉ៃលិន អមដំណើរដោយក្រុមការងារ បានអញ្ជើញជួបសំណេះសំណាល ជាមួយប្រធាន អនុប្រធានបក្សភូមិ និងក្រុមការងារបក្សចុះជួយមូលដ្ឋាន ឃុំស្ទឹងត្រង់ ស្រុកសាលាក្រៅ ដើម្បីត្រៀមផែនការរួមឆ្ពោះទៅកាន់ ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ។
លោកជំទាវ បាន ស្រីមុំ បានមានប្រសាសន៍លើកឡើងថា៖ រយៈពេលជាង៤០ឆ្នាំ គណបក្សប្រជាជនកម្ពុជា ក្នុងការដឹកនាំប្រទេស ប្រកបដោយសុខសន្តិភាព និងមានការអភិវឌ្ឍចម្រើនលើគ្រប់វិស័យ ជាពិសេសហេដ្ឋារចនាសម្ព័ន្ធរូបវ័ន្តនានា ដូចជា៖ សាលារៀន មណ្ឌលសុខភាព ផ្លូវ ភ្លើង អណ្តូងទឹក ស្រះទឹក ប្រឡាយទឹក វត្តអារាម និងការគិតគូរដោះស្រាយនូវរាល់ទុក្ខលំបាកជាក់ស្តែងរបស់ប្រជាពលរដ្ឋ ដែលទាំងអស់នេះ គឺជាមោទនភាពបំផុតរបស់ក្រុមការងារគណបក្សយើង ដែលបានរួមសុខរួមទុក្ខ ជាមួយប្រជាពលរដ្ឋ ទទួលបាននូវសេចក្តីសុខ ភាពសម្បូរសប្បាយរីករាយ និងមានសុភមង្គលគ្រប់ក្រុមគ្រួសារ ។
លោកជំទាវប្រធាន បានមានប្រសាសន៍បញ្ជាក់ថា៖ គណបក្សប្រជាជនកម្ពុជា ដែលមានសម្ដេចតេជោ ហ៊ុន សែន ជាប្រធាន គឺតែងតែប្រកាន់ខ្ជាប់ នូវការការពារសន្តិភាពជាធំ លើសអ្វីៗទាំងអស់ ដូច្នេះសូមបងប្អូនប្រជាជនបន្តបោះឆ្នោត ជូនបេក្ខភាពរបស់គណបក្សប្រជាជនកម្ពុជា ទាំងការបោះឆ្នោតជ្រើសរើសក្រុមប្រឹក្សា ឃុំ/សង្កាត់ និងទាំងការបោះឆ្នោតជ្រើសតាំងតំណាងរាស្ត្រ ដើម្បីចូលរួមការពារសន្តិភាពឱ្យបានយូរអង្វែង និងបន្តការអភិវឌ្ឍន៍តទៅមុខទៀត ព្រោះចាប់តាំងពីពេលបដិសន្ធិ រហូតដល់បច្ចុប្បន្ន គណបក្សប្រជាជនកម្ពុជា រក្សាខ្ជាប់ឥតប្រែប្រួលនូវសារជាតិរបស់ខ្លួន និងកំពុងបន្តឈានទៅមុខលើមាគ៌ាអភិវឌ្ឍន៍រីកចម្រើន ប្រកបដោយមោទនភាព ។
ក្នុងឱកាសនោះផងដែរ លោកជំទាវ បាន ស្រីមុំ ក៍បានមានប្រសាសន៍ផ្តាំផ្ញើ ដល់ថ្នាក់ដឹកនាំ និងមន្ត្រីបក្សគ្រប់លំដាប់ថ្នាក់ ត្រូវពង្រឹងសាមគ្គីភាព ឯកភាពនៅក្នុងជួរបក្ស និងលើកកម្ពស់ស្មារតីសកម្មភាព ទាំងនយោបាយសតិអារម្មណ៍ និងចាត់តាំងឱ្យមានប្រសិទ្ធភាពខ្ពស់ ជាពិសេសត្រូវបន្តខិតខំធ្វើសកម្មភាពឥតថមថយ ប្រកបដោយប្រសិទ្ធភាព ទាំងក្នុងការអនុវត្ត កម្មវិធីនយោបាយ ទាំងក្នុងការកសាងពង្រឹងគណបក្ស ទាំងការផ្សារភ្ជាប់បម្រើប្រជាជន ហើយបន្តដោះស្រាយ និងព្យាយាមលុបបំបាត់ភាពអសកម្ម ដែលធ្វើឲ្យប្រជាពលរដ្ឋ មានការថ្នាំងថ្នាក់ និងត្រូវយកចិត្តទុកដាក់ខ្ពស់បំផុត ចំពោះការរក្សា កម្លាំងចាស់ និងពង្រីកកម្លាំងថ្មី ដែលគ្រប់អាយុបោះឆ្នោត ដើម្បីធានាបានមូលដ្ឋានរឹងមាំ និងសម្រេចគោលដៅរបស់បក្ស គឺយកប្រៀបឈ្នះការបោះឆ្នោត គ្រប់ៗអាណត្តិ ៕
