ការសិក្សាថ្មីដ៏ធំមួយបាននិយាយកាលពីថ្ងៃអង្គារទី២៤ឧសភាថាអ្នករស់រានមានជីវិតពីមេរោគកូរ៉ូណាមានហានិភ័យទ្វេដងក្នុងការវិវត្តទៅរកកំណកឈាមដ៏គ្រោះថ្នាក់ ដែលធ្វើដំណើរទៅកាន់សួតរបស់ពួកគេ បើធៀបទៅនឹងមនុស្សដែលមិនបានឆ្លងមេរោគនេះសោះ ក៏ដូចជាឱកាសនៃការកើនឡើងរោគសញ្ញាផ្លូវដង្ហើមពីរដងផងដែរ។
ការស្រាវជ្រាវដោយមជ្ឈមណ្ឌលគ្រប់គ្រងនិងបង្ការជំងឺ (CDC)បានរកឃើញថា មនុស្សម្នាក់ក្នុងចំណោមមនុស្សពេញវ័យប្រាំនាក់ដែលមានអាយុពី ១៨-៦៤ ឆ្នាំនិងម្នាក់ក្នុងចំណោមបួននាក់ដែលមានអាយុលើសពី ៦៥ ឆ្នាំបានបន្តជួបប្រទះនឹងបញ្ហាសុខភាពដែលអាចទាក់ទងនឹងការតស៊ូរបស់ពួកគេទល់នឹងជំងឺកូវីដ ដែលការរកឃើញនេះគឺស្របគ្នាជាមួយនឹងការស្រាវជ្រាវផ្សេងទៀតដែរ។
ក្នុងចំណោមបញ្ហាសុខភាពទាំងអស់នោះ ហានិភ័យនៃការវិវត្តទៅជាជំងឺស្ទះសរសៃឈាមសួតស្រួចស្រាល់ ពោលគឺកំណកឈាមក្នុងសរសៃឈាមសួតបានកើនឡើងពីរដងទាំងចំពោះមនុស្សពេញវ័យនិងមនុស្សចាស់អាយុ ៦៥ ឆ្នាំឡើងទៅ ដូចរោគសញ្ញាផ្លូវដង្ហើមដែរ គឺ ក្អករ៉ាំរ៉ៃ ឬដកដង្ហើមខ្លីៗ។
អាការៈស្ទះសរសៃឈាមសួតជាធម្មតាធ្វើដំណើរទៅកាន់សួតពីសរសៃជ្រៅនៅក្នុងជើង ហើយអាចបណ្តាលឱ្យមានបញ្ហាធ្ងន់ធ្ងរ រួមទាំងការខូចសួត កម្រិតអុកស៊ីសែនទាប និងការស្លាប់។
ការសិក្សានេះគឺផ្អែកលើកំណត់ត្រាអ្នកជំងឺជាង ៣៥០.០០០ នាក់ដែលឆ្លងជំងឺកូវីដ១៩ ចាប់ពីខែមីនាឆ្នាំ ២០២០ ដល់ខែវិច្ឆិកា ឆ្នាំ២០២១ ធៀបនឹងមនុស្ស ១,៦ លាននាក់នៅក្នុងក្រុម “គ្រប់គ្រង” ដែលបានស្វែងរកការយកចិត្តទុកដាក់ខាងវេជ្ជសាស្ត្រក្នុងខែតែមួយក្នុងនាមជាអ្នកជំងឺ “ក្នុងករណី” ឆ្លើយតប ប៉ុន្តែមិនត្រូវបានធ្វើរោគវិនិច្ឆ័យឃើញមានកូវីដ។
ក្រុមការងារបានវាយតម្លៃលើកំណត់ត្រាសម្រាប់ការកើតឡើងនៃបញ្ហាសុខភាពចំនួន ២៦ ករណីដែលត្រូវបានផ្សារភ្ជាប់ជាមួយនឹងការឆ្លងកូវីដរយៈពេលយូរ។
អ្នកជំងឺត្រូវបានតាមដានរយៈពេលមួយខែគិតចាប់ពីពេលដែលពួកគេមកជួបពេទ្យលើកដំបូងរហូតដល់ពួកគេមានជំងឺជាបន្តបន្ទាប់ ឬរហូតដល់មួយឆ្នាំកន្លងផុតទៅ។
បញ្ហាសុខភាពទូទៅបំផុតនៅក្នុងក្រុមអាយុទាំងពីរគឺរោគសញ្ញាផ្លូវដង្ហើមនិងការឈឺចាប់សាច់ដុំ៕
