ការដែលមានរាងកាយសមសួន មានន័យថា កុមារញ៉ាំបានល្អ ទទួលបានការធ្វើលំហាត់ប្រាណច្រើន និងមានទម្ងន់ដែលមានសុខភាពល្អ ។ បើកូនរបស់អ្នកមានរាងកាយសមសួន រាងកាយរបស់ពួកគេមានដំណើរការល្អ កូនៗក៏មានអារម្មណ៍ល្អ និងអាចធ្វើអ្វីៗគ្រប់យ៉ាងដែលពួកគេចង់ធ្វើ ដូចជារត់លេងជាមួយមិត្តភក្តិរបស់គេជាដើម ។ ឪពុកម្តាយទាំងអស់ពិតជាចង់ដឹងពីរបៀបជួយកូនៗឱ្យមានភាពសមសួន ។ ផ្នែកខ្លះនៃរឿងនេះអាស្រ័យលើឪពុកម្តាយ ដូចជាការញ៉ាំអាហារដែលមានសុខភាពល្អ ឬការសម្រេចចិត្តនាំគ្រួសារទៅដើរលេងតាមកន្លែងធម្មជាតិ ។
នេះជាគន្លឹះខ្លះៗគួរធ្វើ បើអ្នក និងកូនរបស់អ្នកចង់បានរាងកាយសមសួន ៖
១. ញ៉ាំអាហារចម្រុះ ៖ កូនអ្នក និងអ្នកប្រហែលជាមានអាហារដែលពេញចិត្ត ប៉ុន្តែជម្រើសល្អបំផុត គឺញ៉ាំអាហារច្រើនប្រភេទ ។ ប្រសិនបើញ៉ាំអាហារផ្សេងៗគ្នា កូនអ្នកទំនងជាទទួលបានសារធាតុចិញ្ចឹមដែលរាងកាយត្រូវការ ។ ចូរនាំគ្រួសារភ្លក់អាហារថ្មី និងអាហារចាស់ដែលអ្នកមិនទាន់បានសាកមួយរយៈ ។ អាហារមួយចំនួនដូចជាបន្លែបៃតង និងផ្លែឈើចម្រុះពណ៌ពិតជាល្អសម្រាប់ក្រុមគ្រួសារអ្នក ។ ដូច្នេះ ចូរព្យាយាមទទួលទានផ្លែឈើ និងបន្លែយ៉ាងតិច ៥ ដងក្នុងមួយថ្ងៃ ផ្លែឈើ ២ និងបន្លែ ៣ ។ ការរួមបញ្ចូលគ្នាមួយដែលអាចដំណើរការសម្រាប់អ្នក និងកូនរបស់អ្នក គឺអាហារពេលព្រឹកដែលមានផ្លែស្ត្របឺរីធំ ៤ ផ្លែ ជាមួយនឹងធញ្ញជាតិរបស់អ្នក,អាហារថ្ងៃត្រង់ មានការ៉ុតចំនួន ២ និងសម្រាប់អាហារសម្រន់ មានផ្លែប៉ោមមួយផ្លែ ព្រមទាំងអាហារពេលល្ងាច មានប្រូខូលី និងសាឡាដ ។
២. ផឹកទឹក និងទឹកដោះគោ ៖ នៅពេលដែលអ្នកពិតជាស្រេកទឹក ទឹក គឺជាថ្នាំបំបាត់ការស្រេកទឹកដ៏ល្អបំផុត ។ កុមារត្រូវការកាល់ស្យូមដើម្បីបង្កើតឆ្អឹងរឹងមាំ ហើយទឹកដោះគោ គឺជាប្រភពដ៏ប្រសើរនៃសារធាតុរ៉ែនេះ ។ តើកុមារត្រូវការប៉ុន្មាន ? ប្រសិនបើកូនអ្នកមានអាយុពី ៤ ទៅ ៨ ឆ្នាំ ចូរឱ្យគេផឹកទឹកដោះគោ ២ ពែងកន្លះក្នុងមួយថ្ងៃ ។ ប្រសិនបើកូនអ្នកមានអាយុ ៩ ឆ្នាំ ឬចាស់ជាងនេះ សូមព្យាយាមទទួលទានទឹកដោះគោ ៣ ពែងក្នុងមួយថ្ងៃ ។
៣. ស្តាប់រាងកាយ ៖ តើមានអារម្មណ៍ដូចម្តេចទៅ ? នៅពេលកូនអ្នកញ៉ាំ ចូរណែនាំគេឱ្យកត់សម្គាល់ពីអារម្មណ៍របស់ពួកគេ និងពេលដែលក្រពះរបស់ពួកគេមានអារម្មណ៍ថាឆ្អែត ។ ពេលខ្លះក្មេងៗញ៉ាំច្រើនពេកព្រោះពួកគេមិនបានកត់សម្គាល់នៅពេលដែលពួកគេត្រូវការបញ្ឈប់ការញ៉ាំ ។ ការញ៉ាំច្រើនអាចធ្វើឱ្យពួកគេមានអារម្មណ៍មិនស្រួល និងអាចនាំឱ្យឡើងទម្ងន់មិនល្អ ។
៤. កំណត់ពេលវេលាអេក្រង់ ៖ តើម៉ោងអេក្រង់ជាអ្វី ? វាជាចំនួនពេលវេលាដែលពួកគេចំណាយពេលមើលទូរទស្សន៍ ឬវីដេអូ ការលេងហ្គេមវីដេអូ និងការប្រើទូរស័ព្ទឆ្លាតវៃ ថេប្លេត ឬកុំព្យូទ័រ ។ ពេលដែលពួកគេចំណាយពេលកាន់តែច្រើនលើសកម្មភាពអង្គុយទាំងនេះ ពួកគេនឹងមានពេលតិចសម្រាប់សកម្មភាពសកម្មផ្សេងៗដូចជាការលេងបាល់ ការជិះកង់ និងការហែលទឹក ។ ហើយពួកគេប្រហែលជាមិនបានគេងគ្រប់គ្រាន់ទេ ប្រសិនបើគេចំណាយពេលច្រើនជាមួយអេក្រង់មុនពេលចូលគេង ។
៥. សកម្ម ៖ ចូរអ្នកធ្វើកីឡា ឬសកម្មភាពណាដែលអ្នកចូលចិត្ត ហើយធ្វើជាគំរូល្អឱ្យកូនអ្នកបានឃើញ ។ ស្វែងរកវិធីដើម្បីសកម្មជារៀងរាល់ថ្ងៃ ដូចជាការលេងនៅខាងក្រៅ ៕
